브란코: May 2019

KULTURA NO PRODUTU TAIS

HUSI POSTU-ADMINISTRATIVU LURO

Monumento da Pátria iha Posto Administrativo Luro

Luru (port.: Luro) hanesan Postu-Administrativu ida husi munisípiu Lautein (port.: Lautem) iha parte lorosa'e Timór Leste nian. Luro halo fronteira ho Postu-Administrativu Iliomar, Postu-Administrativu Lautem no Munisípiu Baucau.

Luro iha populasaun 5.367 (2010). Área 128,28 km²
Distansia entre Luro ho Lospalos kuaze 65 Km/oras ho kareta.
Ilha no foho barak mak haleu Luro, foho ne’ebe aas liu mak hanesan foho Legumau iha Luro vila. Foho nia as 1.297 metres.

Postu-Administrativu Luro fahe ba area rua:
· Luro parte leten
Suku ne’ebe maka pertense ba Luro parte leten mak hanesan: Suku Luro, Suku Baricafa no Suku Cotamuto.

· Luro parte kraik
Suku ne’ebe mak pertense ba Luro parte kraik mak hanesan: Suku Afabubu, Suku Wairoke no Suku Lakawa.

Durante okupasaun Indonesia nian Odufuro mak sentru administrasaun Luro nian, maibe iha tempu ukun-an agora, populasaun barak mak muda ona ba idak-idak nia suku no Luro Vila maka sai nudar kapitál postu administrativu Luro nian.
Suku 6 iha aldeia 20 mak hanesan:
- Suku Afabubu : Aldeia Daelari no Jafaleo
- Suku Baricafa: Aldeia Afaia, Sarelari, Usuwasu
- Suku Cotamuto: Aldeia Buanomar, Etanisi, Ouroma
- Suku Lakawa: Aldeia Borugai, Boruwali, Oneraba
- Suku Luro: Aldeia Abere, Aelaino, Alahira, Amahira, Watalari
- Suku Wairoke: Aldeia Afanami, Lutu, Luturo, Soba

Mapa Timor Leste

Mapa Munisipiu Lautem & Mapa Postu Administrativu Luro

Lian ne’ebe ema koalia iha Luro iha dialeetu rua:

- Luro kraik (Afabubu, Wairoke no Lakawa) koalia lian Na'ini

- Luro leten (Luro, Baricafa and Cotamuto) koalia lian Sa'ani

Maioridade populasaun mos hatene koalia Lian Indonesia, gerasaun tuan mos hatene koalia lian Portugues.

Luro iha maizmenus 1.005_ha area agrikultur ne’ebe bele uja ba kuda aihan ruma.

Aihan ne’ebe mai husi Luro mak Ai-farina, Fehuk, Talas, Batar no Hare. Bainhira iha tempu funu nia laran, populasaun sira bele han kombili ne’ebe moris fuik iha rai. Populasaun mos bele moris ho hahan husi to’os, animal ne’ebe sira hakiak hanesan karau, bibi, manu, fahi, no bele mos han animal fuik ne’ebe moris fuik iha ai-laran.

KULTURA IHA POSTU-ADMINISTRATIVU LURO

Kultura iha relasaun metin ho sosidade. Kultura hanesan aktividade ne’ebe halao iha komunidade nia leet husi jerasaun ba jerasaun. Luro iha kultura hanesan: uma lulik, barlaki (feto-san-umane), kore metan, se matebian no aktividade seluk- seluk tan ne’ebe sei metin iha komunidade nia leet.

Povu iha Luro konkorda katak persija duni hametin no haburas kultura. Tanba kultura mak identidade ne’ebe uniku ne’ebe hatudu husi kultura rai ne’eba nian. Aktividade kulturais ne’ebe temi iha leeten ne’e hanesan kostume ida ne’ebe avo sira hatutan husi jerasaun ba jerasaun ho nia objetivu atu kaer metin identidade uma kain ida-idak nian no mos atu hametin relasaun entre membru sira ne’ebe involve iha aktividade kulturais ne’e.

Kultura (lian Indonesia: adat) importante tebes atu ita kaer metin tanba husi ida ne’e maka abut ita nia moris sei metin, maske aktividade kulturais Luro nian ne’ebe temi iha leeten ne’e, involve ema barak no mos gasta sasan barak hanesan: osan, karau, kuda, bibi, no fahi. Nune’e mos lakon tempu barak hodi realiza aktividade kultura ne’e.

Iha parte Luro nian, ezemplu ida hanesan halo uma lulik. Aktividade ida ne’e importante atu hametin relasaun familia husi uma kain ida nian. Maibe, atu realiza halo uma lulik ne’e bele han tempu husi fulan tolu to’o tinan ida, no persija kontribusaun maksimu husi membru familia tomak hanesan fo sasan sira ne’ebe mensiona iha leeten.

Dalaruma ba sira ne’ebe osan laiha tenki fa’an sira nia animal ou buka meus ba halo tusan atu nune’e bele reprezenta sira nia familia iha aktividade kulturais ne’e. Maske iha ona familia balu ne’ebe moris modernu teb-tebes katak laiha obrigasaun atu tenki fo kontribusaun ba eventu kulturais ne’e, maibe hare husi lalenok kultura nian ou lia nain sira nia lian, katak ema sira modernu ne’e konsidera laiha ona hun no abut tanba ne’e obrigatoriu atu ema hotu involve-an.

Iha Postu-Administrativu Luro no iha Suku 6 nia laran iha atividade kultural mak hanesan tuir mai ne’e;

a.Uma lisan iha Postu-Administrativu Luro quase tinan-tinan tenke halo tuir bainhira atu tama ona ba fulan Dezembru nia laran.

b. Iha fulan Dezembru no to’o fulan Fevereiru nia laran tenke halo tuir serimonia uluk lai mak foin han batar nurak.

c. Nune’e mos bainhira hatun feto-foun, no feto-foun maka tama uma lisan ida ne’e mos tenke halo tuir lai. Atu nune’e bele buras, nani, funan no fuan ba nafatin.

Koremetan

Sistema koremetan nian iha Postu-Administrativu Luro no iha suku 6 nia laran tomak iha kualidade 3 no 4, mak hanesan:

1. Iha kore-metan nia laran ne’e tenke oho karau 4 ka 5 no halo rate hotu.

2. Iha kore-metan nia laran ne’e tenke oho karau 1 fahi 1 no halo rate hotu.

3. Iha kore-metan nia laran mane-foun hotu-hotu mak tenke lori karau 1, fahi 1 ka 4.

4. Umane lori tais 10 ka liu, no mos karau aman bo’ot ida.

No mos koremetan ne’e gastus bo’ot liu iha Postu-Administrativu Luro no suku 6 nia laran tomak. Iha suku 6 nia laran ne’e ema partisipa hotu bainhira iha ligasaun ho umane mane-foun, no mos hadaet to’o suku 6 nia ema no bele to’o Timor nia laran tomak bainhira ema ruma hola ona Munisipiu seluk ka Postu-Administrativu seluk nia ema, nia feto ka nia mane.

Iha artigu ida ne’e hau sei hakerek deit produtu tais no sasan kultural balun ne’ebe uja iha kultura nian ka atividade seluk sira seluk.

PRODUTU TAIS

Iha Postu-Administrativu Luro existe Produtu kultura ne’ebe mak hanesan iha Postu-Administrativu laran, ne’ebe sai identidade no karakteristika kultura Luro nian, husi produtu sira ne'e Produtu kultura hirak ne'e mak sai hanesan tuir mai ne'e :

1. Tais

Tais nudar produtu ida ne’ebe mak dezenvolve rasik husi povo Timor leste no tais mos iha caracterisco ne’ebe mak diferente entre Munisipiu ida no Munisipiu ida seluk, tais sai hanesan identidade nasaun Timor leste iha mundu intrenasional. Tamba iha seremonia oficial ruma ema uja tais hanesan kondekorasaun ba bainaka ne’ebe mak mai partisipa iha seremonia oficial refere.

Luro nia tais domina liu ho kor mean, no iha kualidade tais ne’ebe la hanesan, mak tais feto adat nian no tais feto modernu nian. Tais mane la halo ba modernu maibe halo modelu ida deit (lian Sa’ani katak utur’u).

a. Tais feto no tais mane adat

Bain-bain uja halo barlake, fo hatais feto foun, lori ba lia mate, falun ema nia isin mate ou falun mate ruin, tais iha ne’e mak importante iha uma lisan nia laran. Tais feto adat nian nia ninin tenke kor kafe ou kor metan (ho lian Sa’ani katak rabi wali imir’i no rabi wali metan’a) ne’ebe iha ona amostra ne’ebe feito ona (lian Sa’ani katak hisir’i).

Kuandu iha ona amostra, tais adat nian bele soru deit e la presiza hili amosta, tanba ne’e tais adat halo fasil liu duke tais modernu ne’ebe bainhira soru tenke hili amostra oi-oin hanesan halo selendang.

Exemplu amostra ba tais feto adat nian

Exemplu amostra ba tais mane adat nian

Iha Postu-Administrativu Luro tais mos ema uja ba iha lia feto-san no umane, tais feto no tais mane sei entrega husi feto-san sira ba iha umane, bainhira umane sira ba entrega hotu ona ninian belis ba feto-san sira.

Hau nia mama halo tais feto adat nian

Tais feto modernu Luro nian sempre uja amostra iha ninin

Uja Tais Feto iha Atividade Dansa Kultural

Hau nia mama halo tais mane adat nian

b. Tais feto modernu

Tais feto modernu (lian Sa’ani katak rabi wali–furu) ne’ebe barak liu uja maioria kor mean (rabi wali-furu imir’i), ou kor matak ka azul (rabi wali-furu metan’a). Tais feto modernu ida ne’e bain-bain uja ba tebedai ou hatais iha seremonia modernu hanesan simu bainaka, asiste festa kasamentu ou (karik special tenke uja tais) ou feto sira bele uja iha seremonia graduasaun iha universitade, tais ida ne’e bele halo ho amostra oi-oin tuir ema ida-idak nia hakarak, tais ida ne’e iha mos ninia selendang ne’ebe bele tau amostra ou leetra.

Tais ida ne’e la uja sai barlake iha feto-san-umane ou lori ba lia mate, maibe bele lori ba lia moris hanesan kasamentu ou halo tinan nudar presente ida.

Tais feto modernu ho amostra uma adat Timor

Hau nia mama halo Tais Feto modernu kor azul ne’ebe uja amostra anjo

Tais Feto modernu ho amostra oi-oin

Selendang bain-bain tara ba bainaka ruma, simu ema bo’ot ruma, ou presente ida ba maluk ruma hanesan kondekorasaun deit, no halo selendang la tama iha obrigasaun iha lei uma lisan nian.

Exemplu selendang ne’ebe uja ho tais modernu

Halo Tais Mane

Tais mane bele suku sai vistidu (Foto. Alfayate Philippina)

Tais mane bele suku sai vistidu (Foto. Alfayate Philippina)

Vistuaria husi tais mane

Membru East Sea babadok Kids uja tais feto Luro ba dansa tradisional

iha serimonia Despedida Bolseiros ME-RDTL, Maiu 2017

Membru East Sea babadok Kids uja tais feto Luro ba dansa tradisional

iha serimonia Despedida Bolseiros ME-RDTL, Maiu 2017

Simu Cruz Joven no Inan Peregrina, iha Kruzamentu Timor Plaza 2 Agostu 2015

Selebra Festa 500 anos Evangelizasaun Igreja Katolika iha Timor Leste &

Entrega Cruz Joven no Inan Peregrina, iha Igreja Aimutin 7 Agostu 2015